ന്യൂഡല്ഹി: ദേശീയ മെഡിക്കല് പ്രവേശനപരീക്ഷയായ നീറ്റ്-യു.ജി. പരീക്ഷയില് അപാകം നടന്നതായുള്ള വിവാദത്തില് നാഷണല് ടെസ്റ്റിങ് അതോറിറ്റി (എന്.ടി.എ.)യുടെ പ്രതികരണം തേടി സുപ്രീംകോടതി. നീറ്റ് പരീക്ഷയുടെ പവിത്രതയെ വിവാദം ബാധിച്ചുവെന്ന് കോടതി ചൂണ്ടികാട്ടി. പരീക്ഷ റദ്ദാക്കണമെന്നും വീണ്ടും പരീക്ഷ നടത്തണമെന്നുമുള്ള ഹര്ജി പരി?ഗണിക്കവേയാണ് സുപ്രീംകോടതി എന്.ടി.എയോട് വിശദീകരണം തേടിയത്.
അതേസമയം, എംബിബിഎസ് അടക്കമുള്ള കോഴ്സുകളിലേക്കുള്ള പ്രവേശനത്തിന്റെ കൗണ്സലിങ് നടപടികള് സ്റ്റേ ചെയ്യാന് സുപ്രീംകോടതി വിസമ്മതിച്ചു. ജസ്റ്റിസ് അസ്മാനുള്ള അധ്യക്ഷനായ ബെഞ്ചാണ് കേസ് പരിഗണിച്ചത്. ജൂലായ് എട്ടിലേക്ക് കേസ് മാറ്റിയിട്ടുണ്ട്.
ദേശീയ മെഡിക്കല് പ്രവേശനപരീക്ഷയായ നീറ്റ്-യു.ജി.യില് 67 പേരാണ് ഒന്നാംറാങ്ക് കരസ്ഥമാക്കിയത്. ഇത്രയേറെപ്പേര് ഒന്നാംറാങ്ക് നേടുന്നത് ആദ്യമാണ്. ഹരിയാണയിലെ ഒരു സെന്ററില്നിന്നുമാത്രം ആറുപേര്ക്ക് മുഴുവന് മാര്ക്കും ലഭിച്ചതായി ആരോപണമുയര്ന്നിരുന്നു. 2020-ല് രണ്ടുപേര്ക്കും 2021-ല് മൂന്നുപേര്ക്കും 2023-ല് രണ്ടുപേര്ക്കുമാണ് മുഴുവന് മാര്ക്ക് ലഭിച്ചത്. 2022-ല് നാലുപേര് ഒന്നാം റാങ്ക് നേടിയെങ്കിലും 715 മാത്രമായിരുന്നു അവരുടെ സ്കോര്. ഇത്തവണ ഒന്നാം റാങ്കില് മാത്രമല്ല, താഴെയുള്ള മറ്റു റാങ്കുകളിലും സ്കോര് വളരെ ഉയര്ന്നതാണ്.
ആരോപണങ്ങള് ശക്തമായതോടെ 44 പേര്ക്ക് മുഴുവന് മാര്ക്കും കിട്ടിയത് ഗ്രേസ് മാര്ക്കിലൂടെയാണെന്ന് എന്.ടി.എ ചെയര്മാന് സുബോദ് കുമാര് സിങ് വ്യക്തമാക്കിയിരുന്നു. പരീക്ഷ വൈകിയതുമൂലം സമയം തികയാതെവന്നവര്ക്ക് സുപ്രീംകോടതിയുടെ നേരത്തെയുള്ള നിര്ദേശ പ്രകാരം ഗ്രേസ് മാര്ക്ക് നല്കി. ഇതാണ് ഒന്നാം റാങ്കിന്റെ എണ്ണം കൂടാന് കാരണം. ഗ്രേസ് മാര്ക്കില് അപാകതയുണ്ടായിട്ടുണ്ടോയെന്ന് പരിശോധിക്കുന്നതിനായി പുതിയ സമിതി രൂപവത്കരിച്ചതായും അദ്ദേഹം പറഞ്ഞിരുന്നു.