അങ്കോല: ഷിരൂരില് മണ്ണിടിച്ചിലില് കാണാതായ അര്ജുന് വേണ്ടിയുള്ള രക്ഷാ ദൗത്യം പത്താംദിനം പിന്നിടുമ്പോള് വെല്ലുവിളികള് ഏറെ. കാലാവസ്ഥ അനുകൂലമല്ലാത്തതിനെ തുടര്ന്ന് ഡൈവിംഗ് നടക്കാന് കഴിയില്ലെന്ന് ദൗത്യം സംഘം അറിയിച്ചു.ഇതോടെ തിരച്ചില് വിവരങ്ങള് വിശദീകരിച്ച് രക്ഷാദൗത്യ സംഘം വാര്ത്താസമ്മേളനം നടത്തി.
ഗംഗാവാലിയില് നാല് ലോഹവസ്തുക്കളുടെ സാന്നിധ്യം കണ്ടെത്തിയതായി റിട്ട മേജര് ജനറല് ഇന്ദ്രബാലന് പറഞ്ഞു. ലോറിയുള്ളത് പുഴയുടെ 10 മീറ്റര് ആഴത്തില്. തടി ട്രക്കില് നിന്ന് വേര്പെട്ടിട്ടുണ്ട്. തടി വേര്പെട്ടതോടെ ലോറി അല്പം ഒഴുകി നീങ്ങി. റോഡില് നിന്ന് 60 മീറ്റര് ദൂരെയാണ് ലോറിയുള്ളത്. അര്ജുന് ലോറിക്ക് അകത്താണോ പുറത്താണോ എന്ന് ഇനിയും സ്ഥിരീകരിക്കാനായിട്ടില്ല. അര്ജുന് ഉള്പ്പടെ മൂന്ന് പേരെയാണ് ഇനി കണ്ടെത്താനുള്ളതെന്നും ദൗത്യസംഘം അറിയിച്ചു.
രാത്രിയിലും ഡ്രോണ് പരിശോധന തുടരും. ലോറിക്കുള്ളില് മനുഷ്യസാന്നിധ്യം സ്ഥിരീകരിക്കാനായിട്ടില്ലെന്നും ദൗത്യസംഘം വ്യക്തമാക്കി. ഡൈവിങ് ഏറെ സങ്കീര്ണമാണ്. പുഴയിലെ ഒഴുക്ക് കൂടുതലാണെങ്കില് ഡൈവര്മാര്ക്ക് ഇറങ്ങാനാകില്ല. ട്രക്കിനുള്ളില് മനുഷ്യശരീരം ഉണ്ടോയെന്ന് സ്ഥിരീകരിക്കാന് ആയിട്ടില്ലെന്ന് കാര്വാര് എംഎല്എയും വ്യക്തമാക്കി.